अम्बिकाबहादुर स्मृति राष्ट्रिय जुडो सुरु
0
Shares

0

काठमाडौं : राष्ट्रिय टिम छनोटका रूपमा समेत रहेको आठौं अम्बिकाबहादुर क्षेत्री स्मृति खुला जुडो प्रतियोगितामा शनिबारदेखि सुरु भएको छ । सातदोवाटोमा भएको प्रतियोगिताको पहिलो दिन पुरुष÷महिलामा समान चार चार गरी आठ स्पर्धामा प्रतिस्पर्धा भएको थियो । प्रतियोगिता अन्तर्गत महिलाको ४८ केजीमुनि त्रिभुवन आर्मी क्लबकी सुमित्रा राई, ७० केजीमुनि १३औं दक्षिण एसियाली खेलकुद (साग)की कांस्य विजेता गंगा चौधरी र ७८ केजीमाथि आर्मीकी आकृति जोशीले राष्ट्रिय टिममा स्थान बनाए ।

फाइनलमा सुमित्राले आफ्नै क्लबकी सुस्मिता लवतलाई पराजित गरिन् । यो तौल समूहमा यसअघि नेपाल प्रहरी क्लबकी सरिता चौधरी राष्ट्रिय टिममा थिइन् । सरिता प्रतियोगितामा सहभागी भइनन् । गंगाले सीतु बोर्डिङ स्कुलकी मग्नोलिया श्रेष्ठलाई फाइनलमा हराइन् । राष्ट्रिय टिममा रहेकी न्यु होराइजन क्लबकी सुनीता मगर ताम्राकार शीर्ष तीन स्थानमै अटाइनन् ।

त्यस्तै आकृतिले राष्ट्रिय टिममा रहेकी कञ्चनपुरकी सुनीता बोहराको चुनौती समाप्त पारिन् । स्वर्गीय अम्बिका बहादुरका परिवारको प्रायोजनमा नेपाल जुडो संघद्वारा आयोजित प्रतियोगिताको महिला ५७ केजीमुनि १३औं सागकी रजत विजेता आर्मीकी मनीता श्रेष्ठ प्रधान पहिलो भइन् । मनीताले फाइनलमा नेपाल एपीएफ क्लबकी देविका खड्कालाई पाखा लगाइन् ।

सातदोबाटोस्थित अन्तर्राष्ट्रिय खेलकुद परिसरमा भएको पुरुषको ५५ केजीमुनि बन्दी सहायता नियोग (पाम)का रोशनबहादुर दोङ पहिलो भए । उनले फाइनलमा ओसिडका हरिराम चौधरीलाई निराश पारे । ६६ केजीमुनि १३औं सागका कांस्य विजेता पामका इन्द्रबहादुर श्रेष्ठ पहिलो भए । उनले फाइनलमा रसुवाका सुनील नगरकोटीलाई पन्छाए ।

पुरुष ८१ केजीमुनि केन्द्रीय जुडो डोजोका मोहन सुनुवारले शीर्ष स्थान हात पारे । मोहनले निर्णायक भिडन्तमा प्रहरीका मनीष महतोमाथि जित रचे । १०० केजीमुनि प्रहरीका रविन श्रेष्ठले फाइनलमा आर्मीका शिवबहादुर बरामलाई पाखा लगाउँदै पहिलो स्थान हात पारे ।पुरुषको ५५ केजीमुनि बाहेक सबै स्पर्धामा पहिलो हुने खेलाडीले राष्ट्रिय टिममा स्थान बनाउने प्रावधान छ । पुरुष ५५ केजीमुनिको तौल राष्ट्रिय टिम तयारीमा राखिएको छैन । महिलाको ४४ केजीमुनि तौलसमूह पनि राष्ट्रिय टिम तयारीमा समावेश छैन । प्रतियोगितामा पहिलो र दोस्रो हुने खेलाडी राष्ट्रिय टिममा पर्नेछन् ।

प्रतियोगिताको राष्ट्रिय खेलकुद परिषद्का सदस्यसचिव केशवकुमार विष्टले एक कार्यक्रमबीच उद्घाटन गरे । प्रतियोगिताअन्तर्गत १६ स्पर्धामा विभिन्न २३ टिमका एक सय ४० खेलाडी सहभागी छन् । पुरुष÷महिलामा समान आठ आठ स्पर्धा समावेश छन् । अन्तिम दिन आइतबार पुरुष÷महिलामा समान चार चार स्पर्धामा भिडन्त हुनेछ ।

यसमा तपाईको मत