आर्मीले उचाल्यो हेटौंडा गोल्डकपको उपाधि
0
Shares

0

हेटौंडाः तेस्रो हेटौंडा गोल्डकप फुटबल प्रतियोगिताको उपाधि चुम्दै नेपाल आर्मीले यस वर्षको सर्वाधिक सफल क्लब बन्न सफल भएको छ । शनिबार हेटौंडा १० स्थित वन बिज्ञान अध्ययन संस्थानको खेल मैदानमा भएको फाइनलमा नेपाल पुलिस क्लबलाई टाइब्रेकरमा ४–३ गोलअन्तरले पन्छाउँदै आर्मी प्रतियोगिताको च्याम्पियन भएको हो ।

खेल अवधिभर दबाबमा रहेका दुवै क्लबका गोल गर्ने पटक पटकको प्रयास असफल भएपछि नतिजाका लागि टाइब्रेकरको सहारा लिइएको थियो ।

गोलक्षक निर्णायक भूमिकामा रहेको टाइब्रेकरमा आर्मीका गोलरक्षक विकेश कुथु नायक सावित भए । उनले पुलिसका दुईवटा प्रहार निस्तेज पार्दै नेपाल आर्मी क्लबलाई सिजनको छैठौं उपाधि चुम्न योगदान दिए । पुलिसका तेज तामाङ र बुद्ध लामाको प्रहार विकेशले बचाए ।

आर्मीको तर्फबाट दीप लामा, विकेश कुथु, विवेक बस्नेत र सन्तोष तामाङले गोल गरेका थिए । तर धेरै दर्शकले अपेक्षा गरेका आर्मीका स्टार फरवार्ड नवयुग श्रेष्ठको प्रहार पोलमा लागेर फर्किएको थियो । पुलिसको तर्फबाट टाइब्रेकरमा अजित राजभण्डारी, सुमन लामा र दिनेश राजवंशीले गोल गरे ।

आर्मीले उपाधिसँगै नगद पाँच लाख रुपैयाँ प्राप्त हात पारेको छ । उपविजेता नेपाल पुलिस क्लबले नगद तीन लाखसहित शिल्ड र मेडलमा चित्त बुझाउनुपर्यो । उनीहरुलाई हेटौंडा उपमहानगरपालिकाका उपमेयर मीना लामा, मध्यपृतना हेटक्वाटर सुपारिटारका पृतनापति उपरथी प्रभुमराम शर्मा, तीन नम्बर प्रदेश प्रहरी प्रमुख एआईजी केशरिराज घिमिरे लगायतले शिल्ड, नगद तथा सम्मानपत्र प्रदान गरेका थिए ।

पाण्डे उत्कृष्ट खेलाडी

प्रतियोगिताको सर्वोत्कृष्ट खेलाडी आर्मीका डिफेन्डर विमल पाण्डे घोषित भए । उनले नगद ५० हजार रुपैयाँ प्राप्त गरे । फाइनल खेलको म्यान अफ दी म्याच आर्मीका गोलरक्षक विकेश घोषित भए ।

उनले नगद पाँचहजार रुपियाँ प्राप्त गरे । उत्कृष्ट प्रशिक्षक आर्मीका नवीन न्यौपाने, गोलरक्षक आर्मीका विकेश कुथु घोषित भए । उत्कृष्ट डिफेन्डर पुलिसका दिनेश राजवंशी, फरवार्ड पुलिसका अभिषेक रिजाल तथा मिडफिल्डर तेज तामाङ घोषित भए । उत्कृष्ट घोषित सवै प्रशिक्षक तथा खेलाडीले नगद पाँचहजार रुपियाँ प्राप्त गरे ।

यसवर्ष आर्मीले खप्तड गोल्डकप, वीरगञ्जमा विशाल स्मृति,सिमरा गोल्डकप, सताक्षी गोल्डकप, मेची नेत्रालय गोल्डकपको उपाधिमा कब्जा जमाएको छ । पुलिसले भने आहारारा गोल्डकप जितेको छ ।

सुमन भोम्जन स्मृति खेलकुद प्रतिष्ठानको आयोजनामा फागुन ५ गतेबाट सञ्चालन भएको प्रतियोगितामा विभागीय तीनसहित आठ टिमको सहभागिता थियो ।



यसमा तपाईको मत