सन्दीप लामिछाने र दीपेन्द्रसिंह ऐरीलाई छुट्टाछुट्टै प्रायोजन
0
Shares

0

काठमाडौं : दुई छुट्टाछुट्टै बैंकले नेपाली राष्ट्रिय क्रिकेट टोलीका चर्चित बलर सन्दीप लामिछाने र दीपेन्द्रसिंह ऐरीलाई प्रायोजन गरेका छन् । इन्डियन प्रिमियर लिग (आईपीएल)मा समेत अनुबन्ध रहन सफल सन्दीपलाई सानिमा बैंकले मासिक ४० हजार रुपैयाँको प्रायोजन गरेको छ । सन्दीपको सम्झौता दुई वर्षको रहनेछ । सानिमाले सन्दीपलाई विगत दुई वर्षदेखि मासिक २० हजार रुपैयाँको प्रायोजन गर्दै आएको थियो । पुरानो सम्झौता अवधि सकिएपछि बिहीबार बैंकले मासिक २० हजार थप गरी पुनः दुई वर्षको नयाँ सम्झौता गरेको हो ।

सोही अवसरमा सन्दीप र कप्तान पारस खड्कालाई नेपाललाई डिभिजन एक र विश्वकप छनोटसम्म पुर्‍याउन महत्वपूर्ण भूमिका निर्वाह गरेको भन्दै सानिमा बैंकका ब्रान्ड एम्बेसडर एवं चर्चित कलाकारद्वय मदनकृष्ण श्रेष्ठ, हरिवंश आचार्य र सानिमा बैंकका प्रमुख कार्यकारी अधिकृत भुवनकुमार दाहालले सम्मान पनि गरे ।

यसैगरी राष्ट्रिय टोलीका सदस्य एवं यू-१९ टोलीका कप्तान दीपेन्द्रसिंह ऐरीलाई पनि ग्लोबल आईएमई बैंकले एक वर्षका लागि मासिक २० हजार रुपैयाँ प्रायोजन गरेको छ । क्रिकेट प्लेअर्स एसोसिएसन नेपाल (सिप्यान) सँगको सहकार्यमा दीपेन्द्र र बैंकबीच बिहीबार सम्झौता भएको हो ।

cricket-player-association-nepal--(4)

सम्झौता आदानप्रदान गर्दै ग्लोबल आईएमईका प्रमुख कार्यकारी अधिकृत जनकशर्मा पौडेल र क्रिकेटर दीपेन्द्रसिंह ऐरी । सुनिता डंगोल

सम्झौताअनुसार बैंकले दीपेन्द्रलाई नगदसहित एक लाख ६० हजार रुपैयाँको खेल सामग्रीसमेत उपलब्ध गराउनेछ । सम्झौतापत्रमा बैंकका प्रमुख कार्यकारी अधिकृत जनक शर्मा पौडेल र दीपेन्द्रले हस्ताक्षर गरे । दीपेन्द्रले बैंकको सहयोगले आफ्नो आगामी खेल थप सुधार हुने बताए ।



यसमा तपाईको मत